25-1-2018
HOME
ABOUT US
CONTACT US
  Untitled Document
Categories
Untitled Document
Untitled Document
ဒေသတွင်း သတင်းစုံ
အကြမ်းဖက်မှုနောက်ပိုင်း မောင်တောနယ်စပ်မှ ကုန်သွယ်မှု ဆောင်ရွက်နေသည့် ကုမ္ပဏီ ဆယ်ခုလျော့ကျသွား
This Week’s COVER
ဂျာနယ် အမှတ်စဉ် .... 1047
အိမ်ခြံမြေ ကြော်ငြာများ
Market Data
အာရှငွေကြေး အခြေအနေ
 USD   EUR 
USD 1 1.209
EUR 0.826

1 

JPY 105.93  128.091
SGD 1.691 2.044
THB 39.56 47.836
Advertising
 
သူ့အတွေး သူ့အမြင်
အတွေးသမားရဲ့ အရေးအသား-၅

ကျင်းပပြီးစီးသွားခဲ့တဲ့ 'စာပေညီလာခံ'ကတော့ မြန်မာစာပေ သမိုင်းမှာ မော်ကွန်းထိုးသွားခဲ့ပြီဗျ။  ညီလာခံရဲ့ အထိမ်းအမှတ်ကြွေးကြော်သံကတော့ 'လွတ်လပ်သောစာပေ၊ လွတ်လပ်သောအသံ' ပါတဲ့ ဗျ။

၁၉၆၂ ခုနှစ်က ရန်ကုန်မြို့၊ သီရိမင်္ဂလာကမ္ဘာအေးကုန်းမြေမှာ စာပေညီလာခံကျင်းပခဲ့ဖူးတယ်။ အဲသည်တုန်းက ကျုပ်တို့ ၁ဝ နှစ်သားလောက် ပဲရှိသေးလို့ အသံကြားရုံပဲ ကြားခဲ့ရပါတယ်။ အရွယ်ရောက်မှ ညီလာခံနဲ့ပတ်သက်တဲ့ မှတ်တမ်းမှတ်ရာတွေ ပြန်ဖတ်ရတော့ အဲသည်တုန်းကလည်း စာပေညီလာခံဟာ ကြီးကျယ်ခမ်းနားခဲ့တာ အမှန်ပါပဲ။ လွတ်လပ်ပျော်ရွှင်ခဲ့ကြတာ အမှန်ပါပဲ။          

ကျုပ်အသက် ၇ဝ နားနီးခါမှ ခမ်းနားသိုက်မြိုက်စွာ ပေါ်ထွက်လာခဲ့တဲ့ 'စာပေညီလာခံ ၂ဝ၁၇' ဆိုတာ ကတော့ဖြင့် မြန်မာစာပေသမိုင်းမှာ အဓိကမှတ်တိုင်ကြီး စိုက်လိုက်တာပါပဲ။ ဆွေးနွေးပွဲစကားဝိုင်းပေါင်းများစွာ စီစဉ်ပေးခဲ့တာကိုကလည်း ထူးခြားမှုတစ်ခုပါပဲ။

အဲသည်ဆွေးနွေးပွဲတွေ လေထဲမှာ လေနဲ့အတူပျောက်ပျက်မသွားရအောင် သက်ဆိုင်ရာက မှတ်တမ်း စာအုပ်ထုတ်ဝေရောင်းချနိုင်ရင်တော့ ကောင်းမဗျ။ အင်းလေ .. ဒါက ကိုယ့်ဆန္ဒကိုသာ ပြောရတာပါ။

တကယ်က လက်ရှိမှာ စာအုပ်ထုတ်ဝေရေးတွေက ချည့်နဲ့နေကြတော့ မှတ်တမ်းစာအုပ်မထုတ်နိုင်လည်း အပြစ်ပြောဖို့ မရှိပေဘူးဗျ။

ညီလာခံကျင်းပဆဲတစ်ရက်မှာ စာရေးဖော်မိတ်ဆွေလူငယ်တစ်ဦးနဲ့တွေ့တော့၊ ကျုပ်က ...

''စာပေညီလာခံ မသွားဘူးလား'' လို့ မေးလိုက်တော့ မိတ်ဆွေလူငယ် စာရေးဆရာက...

''ညီလာခံတွေ၊ အစည်းအဝေးတွေ၊ စကားဝိုင်းတွေ၊ Debate တွေ၊ စာတမ်းဖတ်ပွဲတွေက ကျွန်တော်နဲ့မဆိုင်ဘူး။ ကျွန်တော်က ကိုယ့်အ လုပ်ပဲကိုယ်လုပ်တာ ကျွန်တော့်အလုပ်က စာရေးနေမယ်လေဗျာ။ ပြီးတော့ စာအုပ်ထုတ်ပြီး ပရိသတ်ဆီ ပို့လိုက်တာပေါ့''လို့ ပြုံးပြုံးရယ်ရယ်နဲ့ ပြောသဗျ။

သူပြောတာကလည်း ဟုတ်တုတ်တုတ်။

ကျုပ်တို့ စာရေးဆရာအလုပ်ဆိုတာ ပုဂ္ဂလိက အဆန်ဆုံး အလုပ်မဟုတ်လား။ စာရေးတယ်ဆိုတာ တစ်ကိုယ်တော်ဖန်တီးခြင်း မဟုတ်လား။ စာရေးဆရာတစ်ယောက် မျက်စိပျက်သွားလို့ဖြစ်စေ၊ လက်ကျိုးသွားလို့ဖြစ်စေ ဒုက္ခိတဖြစ်သွားတဲ့အခါမှပဲ၊ စာရေးဆရာက ပါးစပ်ကပြော ဘေးလူတစ်ယောက်က ကိုယ်စားဝင်ရေးပေးရတာမျိုးမဟုတ် လား။

ဒီခေတ်မတော့ ကွန်ပျူတာနဲ့စာရိုက်တတ်တဲ့ သူတစ်ယောက်ခေါ်ပြီး ကိုယ်ကပါးစပ်ကပြော။ သူက ကွန်ပျူတာနဲ့ ရိုက်ပြီးရင် ဗိုက်ဘာနဲ့ပို့လိုက်ရင် ထုတ်ဝေသူ၊ အယ်ဒီတာဆီ ရောက်သွားကရော မဟုတ်လား။ (ဒါမှမဟုတ်) ကိုယ်တိုင်ကွန်ပျူတာ သုံးနိုင်ရင် သက်မဲ့ကွန်ပျူတာနဲ့တွင်ပဲ အလုပ်ဖြစ်နေပြီ မဟုတ်လား။

ဒါတော့လည်း ဒါပေါ့ဗျာ။

သို့ သော် အဓိက ပြဿနာက စာရေးဆရာဆိုတာ လူထဲက လူမဟုတ်လား။

Social Animal လို့ခေါ်တဲ့ လူမှုရေးသတ္တဝါပဲ မဟုတ်လား။

စုဝေးတိုင်ပင်ခြင်းဆိုတာ လူ့ယဉ်ကျေးမှု အမှတ်လက္ခဏာပဲ မဟုတ်ဘူးလား။

ရှင်မဟာရဋ္ဌသာရတို့၊ ရှင်ဥတ္တမကျော်တို့ ခေတ်ကတော့ စာပေနယ်ပယ်က ကျဉ်းမြောင်းသကိုးဗျ။  စာပေဆိုတာ နန်းတွင်းမှာပဲ အသက်ဝင် ခဲ့သကိုးဗျ။  

ခုခေတ်စာပေနယ်ပယ်ကတော့ ''ကမ္ဘာလွှမ်းခြုံ'' Globalization ဖြစ်နေပါသကော။

စာရေးဆရာ အချင်းချင်းဖြစ်စေ၊ စာရေးဆရာနှင့်ထုတ်ဝေသူနဲ့ ဖြစ်စေ၊ စာရေးဆရာနဲ့ စာဖတ်ပရိသတ်ဖြစ်စေ လူမှုကွန်ရက်ပေါ်မှာတွေ့ဆုံလို့ ရနေပြီမဟုတ်လား။  ဒီလိုတွေ့ ဆုံနိုင်ရုံနဲ့ကော၊ စာပေလောက တိုးတက်ဖွံ့ဖြိုးဖို့ ကြီးမားတဲ့ အထောက်အ ကူမဖြစ်သေးဘူးဗျ။ စာရေးဆရာတွေကိုတော့ စာအုပ်ထုတ်ဝေသူတွေကိုကော၊ စာဖတ်ပရိသတ်များကိုပါ 'ညီ လာခံ' ကျင်းပပြီး နှိုးဆော်အသိပေးဖို့လည်း လိုအပ်လာတာကိုခင်ဗျ။

ဒါကြောင့်လည်း သက်ဆိုင်ရာ ဝန်ကြီးဌာနများ၊ စေတနာရှင်များရဲ့ အထောက်အပံ့နဲ့ ငွေကြေးအမြောက် အများသုံးစွဲရတဲ့ စာပေညီလာခံကြီး ပေါ်ပေါက်လာတာပါပဲ။

ကျုပ်စာပေနယ်ထဲကို ဝင်လာတဲ့ ၁၉၇ဝ လောက်ကစပြီး ကနေ့အထိ စာပေညီလာခံဆိုတာ အရိပ်အ ယောင်မျှတောင်မတွေ့ခဲ့ရပါဘူး။ စာတမ်းဖတ် ပွဲဆိုတာတွေလောက်နဲ့ပဲ အာသာဖြေခဲ့ရပေသပေါ့ဗျာ။ စာပေ ဟောပြောပွဲ ဆိုသဟာကလည်း ကိုယ်နဲ့ နီးစပ်မှ သွားခွင့်၊နားထောင်ခွင့်ရ တာမဟုတ်လား။

စစ်အာဏာရှင် ခေတ်တစ်လျှောက်လုံး စာပေဟောပြောပွဲဆိုတာတွေ ရှိခဲ့ပါရဲ့။ သို့ပေမယ့် ကျင်းပခွင့်(ပါမစ်)ရဖို့ ကျားဖင်နှိုက်ရသလို ခက်ခဲလှပါရဲ့ဗျာ။

စာပေဟောပြောပွဲတွေမှာ စစ်အာဏာရှင်မကြိုက်တာ ဟောပြောမိလို့ ထောင်နန်းစံခဲ့ရတဲ့ စာရေးဆရာ ကြီးများတောင်ရှိခဲ့ဖူးပါရဲ့။

ကျုပ်မလည်း စာပေစိစစ်ရေးရဲ့ မဟာ့မဟာ  'ပညတ်တော်'များကို ရှောင်ရင်းတိမ်းရင်း လိုက်တမ်းပြေး တမ်းကစားရင်း စာပေလူလားမြောက် ခဲ့ရတာပခင်ဗျာ။

အခုနှစ်ပိုင်းတွေမှာ လူပြောသူပြောများလာတာကတော့ ကျုပ်တို့ နိုင်ငံသားတွေ 'စာဖတ်အားကျ'လာတာ။ စာဖတ်အားကျတော့ စာအုပ် အရောင်းအဝယ်ကျသွားတာ၊ စာသိပ်မဖတ်ကြတော့ အတွေးအခေါ်၊ အဆင်အခြင်အားနည်းကုန်ကြတာတွေပါပဲ။

‘Facebook ဖတ်မှ ခေတ်မီသကွ'လို့ လာမပြောနဲ့။

Fb ဆိုတာ Old wives’tales လို့ခေါ်တဲ့ ရောက်တတ်ရာရာ အတင်းအဖျင်းတွေရေးလို့တော့ သိပ်ကောင်းတဲ့ နေရာသာဖြစ်တယ်။ စာရေးဆရာတွေက အနုပညာမြောက်တဲ့ စာပေမျိုးကို Fb မှာ ဘယ်သောအခါမျှ မရေးကြပါဘူး။ ဒါကြောင့် Fb ဖတ်တာကို စာဖတ်တယ်လို့ခေါ်ရင် အလွဲ ပါပဲ။

Fb ဆိုတာ လူမှုကွန်ရက် အနွယ်ဝင်ဖြစ်တာကြောင့် နောက်ပြီး လွတ်လပ်ခွင့်ရနေတာကြောင့် ဖေတော့မောင်တော့ လူမှုရေးတွေကို ရေးကြတာသာများပါတယ်။

ကျုပ်တို့ မြန်မာနိုင်ငံအနေအထားကလည်း Onlineမှာ စာဖတ်ကြဖို့ အခွင့်အရေးပြည့်ပြည့်ဝဝမရသေးပါဘူး။ သည်တော့ အရမ်းခေတ်မီချင်လို့ မဖြစ်သေးပါဘူး။ 'စာအုပ်စာပေ လူ့မိတ်ဆွေ'ဆိုတဲ့ Books For All ကိုသာ သတိရကြပါဗျာ။

 

ကြူးနှစ်

ကြူးနှစ်
 
Untitled Document
No comments yet...be the first to comment
  Name :  (required)
  Email :  (will not be published) (required)
  Comment :
 
Email: [email protected] Copyright 2004 Zaygwet Journal. All rights reserved.
Powered By eTrade Myanmar Co., Ltd.