16-11-2017
HOME
ABOUT US
CONTACT US
  Untitled Document
Categories
Untitled Document
Untitled Document
ဒေသတွင်း သတင်းစုံ
မြန်မာ-အိန္ဒိယချစ်ကြည်ရေး လမ်းမကြီးဖြစ်သည့် ကလေးဝ-တမူးလမ်းပိုင်းရှိ တံတား ၆၉ စင်းကို အိန္ဒိယနိုင်ငံမှ အမေရိကန်ဒေါ်လာ သန်း ၆ဝ အကုန်အကျခံတည်ဆောက်ပေးမည်
This Week’s COVER
ဂျာနယ် အမှတ်စဉ် .... 1037
အိမ်ခြံမြေ ကြော်ငြာများ
Market Data
အာရှငွေကြေး အခြေအနေ
 USD   EUR 
USD 1 1.209
EUR 0.826

1 

JPY 105.93  128.091
SGD 1.691 2.044
THB 39.56 47.836
Advertising
 
သူ့အတွေး သူ့အမြင်
ပိဋကသုံးပုံ

ကျွန်တော်သည် ၂၄-၁ဝ-၂ဝ၁၇  ရက်က ပန်းဆိုးတန်းရှိ စာပေလောက-၂ စာအုပ်ဆိုင်သို့ လစဉ်ထုတ်ဝေလေ့ရှိသော Burma Focus ခေါ် နိုင်ငံတကာ စာနယ်ဇင်း အသီးသီးတို့၌ ရေးသားဖော်ပြခဲ့ကြသော မြန်မာနိုင်ငံနှင့် စပ်ရာဆောင်းပါးအ ထွေထွေတို့ကို စုစည်းပုံနှိပ်ထားသည့်စာအုပ်ကို သွားရောက်ရှာဖွေစဉ် ပိဋကတ်သုံးပုံကို ပါဠိ မူအတိုင်းဖြင့်လည်းကောင်း၊ မြန်မာပြန်မူဖြင့်လည်းကောင်း၊ အစုံလိုက်ဝယ်ယူနိုင် ကြောင်းတွေ့ရှိခဲ့သဖြင့် ပိဋကတ်သုံးပုံ မြန်မာပြန်တစ်စုံ (အုပ် ၃ဝ) ကို ကျပ်တစ်သိန်းခုနစ်သောင်းဖြင့် ဝယ်ယူခဲ့သည်။

ပိဋကတ်သုံးပုံတစ်စုံလုံးကို  အသက်ရှစ်ဆယ်နီးပါး ဤအရွယ်သို့ရောက်မှ ဘာကြောင့်များ ဝယ်ချင်နေရပါလိမ့်ဟု စာဖတ်သူများက တွေးမိပါလျှင် ထိုအတွက်အဖြေကို နောက်မှရေးပြပါမည်။

ယခုရှေးဦးစွာ ပိဋကတ်သုံးပုံအကြောင်းကို ပြောပြပါဦးမည်။

မြတ်စွာဘုရားဟောကြားတော်မူခဲ့သော တရားတော်များကို ပိဋကအရ ခွဲခြားလျှင် သုတ္တန်၊ ဝိနည်း၊ အဘိဓမ္မာဟူ၍ သုံးစုရပါသည်။ ယင်းသို့ ခွဲခြားအပ်သော သုံးခုကိုပင်လျှင် ပိဋကသုံးပုံ (ပိဋကတ်သုံးပုံ)ဟု ခေါ် ခြင်း ဖြစ်ပါသည်။

ပိဋကသုံးပုံကို 'နိကာယ်' အားဖြင့် ပိုင်းခြားခွဲဝေသည့်အခါ နိကာယ်ငါးရပ်ရပါသည်။ နိကာယ်ဆိုသည်မှာ 'နိကာယ' ဟူသော ပါဠိစကားကို မြန်မာမှုပြုထားခြင်းဖြစ်သည်။ ထိုပါဠိစကား၏ အဓိပ္ပာယ်မှာ 'အပေါင်းအစု' ဟူ၍ ဖြစ်ပါသည်။

နိကာယ်ငါးရပ်ကို ဘုရားရှင် ဟောကြားတော်မူသောသုတ်များ၏  အရှည်အတိုလိုက်၍ ခွဲခြားထားပုံမှာ အောက်ပါအတိုင်းဖြစ်သည်။

(၁) ဒီဃနိကာယ်=ရှည်သောသုတ် များကို စုပေါင်းထားခြင်း။

(၂)   မဇ္ဈိမနိကာယ်=မရှည်မတို သုတ် များကို  စုပေါင်းထားခြင်း။

(၃) သံယုတ္တနိကာယ်=သဘောတူရာ၊ ဟောကြားချက်တူရာတို့ကို စုပေါင်း ထားခြင်း။

(၄)   အဂုင်္တ္တရနိကာယ်=အင်္ဂါတစ်ခု  စီ ကျော်လွန်သည့် သုတ်များကို စုပေါင်းထားခြင်း။ (တစ်ပါး၊ နှစ်ပါး၊ သုံးပါး စသည်ဖြင့် ၁၁ မျိုးအထိ တရားသဘောအင်္ဂါရပ်များကို တိုး၍ တိုး၍ စုပေါင်းထားသည်။)

(၅)   ခုဒ္ဒကနိကာယ်=တိုသောသုတ် များကို စုပေါင်းထားခြင်း။

ဖော်ပြပါ နိကာယ်ငါးရပ်တို့တွင် ကျမ်းပေါင်း ၅၂ ကျမ်းပါဝင်သည်။ ထို ၅၂ ကျမ်းတွင် အချို့ကျမ်းများကို တစ်ကျမ်းတစ်အုပ်မဟုတ်ဘဲ နှစ်ကျမ်း၊ သုံးကျမ်းကို တစ်အုပ်ပေါင်း၍   စာအုပ်အဖြစ် ပုံနှိပ်လိုက်သောအခါ  စုစုပေါင်း အုပ်ရေ ၄ဝ ရှိပါသည်။

ထုိ့ကြောင့် နိကာယ်ငါးရပ်ကို ကျမ်းအရေအတွက်နှင့် စာအုပ်အရေအတွက်ကို အောက်ပါအတိုင်း ပြနိုင်ပါသည်။

(၁) ဒီဃနိကာယ် ၃ ကျမ်း - ၃ အုပ်

(၂)   မဇ္ဈိမနိကာယ် ၃ ကျမ်း- ၃ အုပ်

(၃)   သံယုတ္တနိကာယ် ၅ကျမ်း-၃အုပ်

(၄)အဂုင်္တ္တရနိကာယ် ၁၁ကျမ်း-၃အုပ်

(၅) ခုဒ္ဒကနိကာယ် ၃ဝကျမ်း-၂၈အုပ်

စုစုပေါင်း  ၅၂ကျမ်း-၄ဝအုပ်

ခုဒ္ဒကနိကာယ်တွင်

(က) ဝိနည်း ၅ ကျမ်း ၅ အုပ်

(ခ)   အဘိဓမ္မာ ၇ ကျမ်း ၁၂ အုပ်

(ဂ)   သုတ္တန် ၁၈ ကျမ်း ၁၁ အုပ်

စုစုပေါင်း ၃ဝ ကျမ်း ၂၈ အုပ်

ဤတွင် ဝိနည်းငါးကျမ်းနှင့် အဘိဓမ္မာခုနစ်ကျမ်းတို့ကို ခုဒ္ဒကနိကာယ်ဟူ၍ ခေါ်ဝေါ်လေ့မရှိဘဲ ဝိနည်းငါးကျမ်း၊ အဘိဓမ္မာ ခုနစ် ကျမ်းဟူသော အမည်များဖြင့်သာ ခေါ်ဝေါ်လေ့ရှိကာ ကျန် ၁၈ ကျမ်း (၁၁ အုပ်) တို့ကိုသာလျှင် ခုဒ္ဒကနိကာယ်ဟူ၍ ခေါ်ဝေါ်ကြသည်။

ထိုနိကာယ်ငါးရပ်တွင် သုတ္တန်  အရေအတွက်အားဖြင့် ၁၇၅ဝ၅ ရှိ သည်။

ယင်းတို့မှာ အောက်ပါအတိုင်းဖြစ်သည်။

ဒီဃနိကာယ်     သုတ္တန်ပေါင်း ၃၄

မဇ္ဈိမနိကာယ်     ။     ၁၅၂

အဂုင်္တ္တရနိကာယ် ။       ၉၅၅၇

သံယုတ္တနိကာယ် ။       ၇၇၆၂

                     စုစုပေါင်း ၁၇၅ဝ၅

 

ဒီဃနိကာယ် သုံးကျမ်းမှာ

(၁)   သီလခန္ဓဝဂ္ဂ (သီလက္ခန္ဓဝဂ်)

(မြန်မာလို သုတ်သီလက္ခန်ဟု ခေါ်သည်။)

(၂)   မဟာဝဂ္ဂ (မဟာဝဂ်) (မြန်မာလို  သုတ်မဟာဝါဟု ခေါ်သည်။)

(၃)   ပါထိကဝဂ္ဂ (ပါထိကဝဂ်) (မြန်မာလို သုတ်ပါထေယျဟု ခေါ်သည်) တို့ဖြစ်သည်။

မဇ္ဈိမနိကာယ် သုံးကျမ်းမှာ

(၁)   မူလပဏ္ဏာသ (ရှေးဦးအစဖြစ် သည် သုတ် ၅ဝ ပါကျမ်း)

(၂)   မဇ္ဈိမပဏ္ဏာသ (အလယ်သုတ် ၅ဝ ပါကျမ်း)

(၃)   ဥပရိပဏ္ဏာသ (နောက်ဆုံးသုတ် ၅၂ သုတ်ပါကျမ်း) တို့ဖြစ်သည်။

 (ပဏ္ဏာသဟူသော ပါဠိမှာ ငါးဆယ်ဟု အဓိပ္ပာယ်ရသည်။ ၅၂ သုတ်ပါသည်ကို ပဏ္ဏာသ = ၅ဝ ဟူ ၍ ဖော်ပြခြင်းကား နိပါတ်တော် ၅၄၇ ကို ၅၅ဝ ဟူ၍ နီးရာကိန်းပြည့် ဖြင့် ခေါ်ဝေါ်ခြင်းမျိုးကဲ့သို့ပင် အစွန်းထွက် ၂ ကို ပမာဏမပြုတော့ဘဲ ပဏ္ဏာသ (၅ဝ) ဟုပင် ခေါ်လိုက်ခြင်း ဖြစ်သည်။

 

သံယုတ္တနိကာယ် ငါးကျမ်းမှာ

(၁)   သဂါထာဝဂ္ဂ သံယုတ်

(၂)   နိဒါနဝဂ္ဂ သံယုတ်

(၃)   ခန္ဓဝဂ္ဂ သံယုတ်

(၄)   သဠာယတနဝဂ္ဂ သံယုတ်

(၅)   မဟာဝဂ္ဂ သံယုတ်တို့ဖြစ်သည်။

 

အဂုင်္တ္တရနိကာယ် ၁၁ ကျမ်းကို

(၁)   ဧကနိပါတ်မှ စတုတ္ထနိပါတ် အထိ  လေးကျမ်းကို တစ်အုပ်

(၂)   ပဉ္စကနိပါတ်မှ သတ္တကနိပါတ် အထိ သုံးကျမ်းကို တစ်အုပ်

(၃)   အဋ္ဌကနိပါတ်မှ ဧကာဒသမ နိပါတ်အထိ လေးကျမ်းကို တစ်အုပ်ဟူ၍ ပ+ဒု+တ သုံးအုပ်ခွဲ၍ ပုံနှိပ်ထားသည်။

 

ခုဒ္ဒကနိကာယ်တွင် ပါဝင်သော ဝိနည်းငါးကျမ်းမှာ

(၁)   ပါရာဇိက - ပါရာဇိကဏ်

(၂)   ပါစိတ္တိယ - ပါစိတ်

(၃)   မဟာဝဂ္ဂ - ဝိနည်းမဟာဝါ

(၄)   စူဠဝဂ္ဂ - စူဠဝါ

(၅)   ပရိဝါရ - ပရိဝါ ဟူ၍ ဖြစ်သည်။

 

ခုဒ္ဒကနိကာယ်တွင်ပါဝင်သော အဘိဓမ္မာ ခုနစ်ကျမ်းမှာ

(၁)   ဓမ္မသင်္ဂဏီ

(၂)   ဝိဘင်္ဂ - ဝိဘင်း

(၃)   ဓာတုကထာ

(၄)   ပုဂ္ဂလပညတ္တိ - ပုဂ္ဂလပညတ်

(၅)   ကထာဝတ္ထု

(၆)   ယမက - ယမိုက်

(၇)   ပဋ္ဌာန - ပဋ္ဌာန်းဟူ၍ဖြစ်သည်။

 

ခုဒ္ဒကနိယာယ်တွင် ပါဝင်သော သုတ္တန် ၁၈ ကျမ်းမှာ

(၁)   ခုဒ္ဒကပါဋ္ဌ

(၂)   ဓမ္မပဒ

(၃)   ဥဒါန - ဥဒါန်း

(၄)   ဣတိဝုတ္ထက - ဣတိဝုတ်

(၅)   သုတ္တနိပါတ - သုတ္တနိပါတ်

(၆)   ဝိမာနဝတ္ထု

(၇)   ပေတဝတ္ထု

(၈)   ထေရဂါထာ

(၉)   ထေရီဂါထာ

(၁ဝ) အပဒါန - အပဒါန်

(၁၁) ဗုဒ္ဓဝံသ - ဗုဒ္ဓဝင်

(၁၂) စရိယပိဋက

(၁၃) ဇာတက - ငါးရာ့ငါးဆယ်ဇာတ်

(၁၄)  မဟာနိဒ္ဒေသ-စူဠနိဒ္ဒေသ

(၁၅) ပဋိသမ္ဘိဒါမဂ္ဂ-ပဋိသမ္ဘိဒါမဂ်

(၁၆) မိလိန္ဒပဥှာ

(၁၇) နေတ္ထိ

(၁၈) ပေဋကောပဒေသကျမ်းများ ဟူ၍ ဖြစ်သည်။

ပိဋကတ်သုံးပုံကျမ်းများနှင့် ပိဋကတ်တော်ကျမ်းစာအုပ်များအကြောင်းကို ဖော်ပြပြီးနောက် ဘာကြောင့်များ ဤအရွယ်ကြီးရောက်မှ ဤပိဋကတ် သုံးပုံစာအုပ်တွေကို ဝယ်ရပါသနည်းဟု မေးသော်မေးထိုက်ပါ၏။ အဘယ် ကြောင့်ဆိုသော် ကျွန်တော်သည် ပိဋကနှင့် စပ်ရာစာမေးပွဲတွေဖြေမည့်  သူလည်းမဟုတ်၊ စာတစ်အုပ်ကို ကောက်ကိုင်ဖတ်လိုက်ပြီဆိုလျှင်လည်း ၁၅ မိနစ် မိနစ် ၂ဝ လောက်ထက် ပိုကြာသွားပါက မျက်စိကဝါးသွားပြီး စာတွေကို ကွဲပြားစွာမမြင်ရ တော့ မျက်ရိုးတွေကိုက်လာသည်။ ပေပြီးကြာကြာဖတ်လျှင် ခေါင်းပါအုံလာ၊ မူးဝေလာတတ်သည်။

တကယ်တော့ စာတွေများများ စားစားဖတ်နေဖို့ သင့်တော့သည် အရွယ်မဟုတ်တော့ပါ။

သို့ရာတွင် ကျွန်တော် ထိုစာအုပ်တွေကို ဝယ်လာခြင်း၏ ပထမအကြောင်းမှာ ရုပ်တရားက ခွင့်ပြုသလောက်တော့ ဖတ်ရတာပေါ့၊ ဖတ်လျှင်လည်း ဖတ်ရင်း ကုသိုလ်တိုး၍ ဖတ်ဖြစ်သောစာကို အခြေပြု၍ ဆောင်းပါးရေးမည်ဆိုတော့လည်း ရေးစရာအကြောင်းအရာလည်းရတာ ပေါ့ဟူသော အတွေးဖြင့် ဝယ်ယူခဲ့ ခြင်းဖြစ်သည်။

ဒုတိယအကြောင်းမှာ ကျွန်တော်သည် နောင်တွင် စာရေးသည့်အလုပ်ကိုတောင် လျှော့ချပြီး ဝိပဿနာအလုပ်ဘက်ပို၍ အချိန်ပေးသွားတော့မည်ဟူသော ရည်စူးချက်ရှိရာ ထိုသို့စာရေး၊ စာဖတ်ခြင်းသိပ်မလုပ်တော့မည့် အချိန်ရောက်လျှင် ကျွန် တော့်မှာရှိသော စာအုပ်များကို အမာခံထား၍ ကျွန်တော်ငယ်စဉ်က စာသင်ယူလာခဲ့သော သာဝတ္ထိ       အ.ထ.က ကျောင်းတွင် စာကြည့် တိုက်ကလေးလုပ်ပေးရန် (ထိုက်သင့်သော ငွေပမာဏဖြင့် ငွေပဒေသာပင် ကလေးလည်း ဘဏ်မှာ စိုက်ပေးထားမည်) ရည်ရွယ်ချက်ရှိသည်။ ထိုအခါတွင် ဤပိဋကတ်တော် မြန်မာပြန်များ ထိုစာကြည့်တိုက်တွင် ထားချင်ထား သို့မဟုတ် ဘုန်းကြီးကျောင်း တစ်ကျောင်းကျောင်းသို့ လှူ၍လည်း ဒါနပြုနိုင်သည်ဟူသော အတွေးဖြင့် ဖော်ပြပါ ပိဋကတ်သုံးပုံ (မြန်မာပြန်) တစ်စုံကို ဝယ်ယူခဲ့ခြင်းဖြစ်သည်။

ဒုတိယ ရည်ရွယ်ချက်ရောက်ဖို့ ကားကျွန်တော့်မှာ မိသားစုအတွက် ငွေကြေးကြောင့်ကြဖို့မလိုတော့သည့်  အခြေအနေရောက်ဖို့ လိုသေး၏။

ပထမရည်ရွယ်ချက်မှာမူ ပြည့် သင့်သလောက် ပြည့်နေသည်ဟု ဆိုနိုင်သည်။  ည ၂ နာရီခွဲ ၃ နာရီ တွင် ရေထတင်ရင်း ရေမပြည့်မီ အချိန်အတွင်း ကျွန်တော်သည် ဤ ပိဋကတ်မြန်မာပြန်များကို ဖတ်သဖြင့် သုတတိုးကုသိုလ်တိုးနေသည့်အပြင် ယခု ထိုစာအုပ်များအကြောင်းကို စာဖတ်သူများအား ရေးပြလိုက်တော့လည်း ဆောင်းပါးတစ်ပုဒ် ရသွားသောကြောင့်ဖြစ်ပါသတည်း။

 

ဦးတင်ဦး (ကျူရှင်)

ဦးတင်ဦး (ကျူရှင်)
 
Untitled Document
No comments yet...be the first to comment
  Name :  (required)
  Email :  (will not be published) (required)
  Comment :
 
Email: [email protected] Copyright 2004 Zaygwet Journal. All rights reserved.
Powered By eTrade Myanmar Co., Ltd.