21-9-2017
HOME
ABOUT US
CONTACT US
  Untitled Document
Categories
Untitled Document
Untitled Document
ဒေသတွင်း သတင်းစုံ
မန္တလေးတိုင်းဒေသကြီးတွင် နိုင်ငံခြား ရင်းနှီးမြှုပ်နှံမှု ဒေါ်လာ သန်း ၇ဝဝ ကျော်ရှိ
This Week’s COVER
ဂျာနယ် အမှတ်စဉ် .... 1029
အိမ်ခြံမြေ ကြော်ငြာများ
Market Data
အာရှငွေကြေး အခြေအနေ
 USD   EUR 
USD 1 1.209
EUR 0.826

1 

JPY 105.93  128.091
SGD 1.691 2.044
THB 39.56 47.836
Advertising
 
သူ့အတွေး သူ့အမြင်
ဘာသာရေး ယုံကြည်ချက်နှင့် ပတ်သက်၍

လူ့လောကသို့ စတင်ရောက်ရှိလာသည့် မွေးကင်းစကလေးငယ်၏  ပထမဦးဆုံး အတွေ့အကြုံသည် ဘာသာရေးနှင့် အစပြုသည်ဆိုလျှင် အံသြကြပါလိမ့်မည်။ မည်သည့် ဘာသာဝင်ဖြစ်စေ မွေးကင်းစကလေးငယ်၏ မိဘနှစ်ဦးသည် သူတို့ ယုံ ကြည်ကိုးကွယ်သော ဘာသာဝင်တစ်ဦးအနေနှင့်သာ လက်ခံကြ၊ မြင်ကြသည်မှာ ဓမ္မတာဖြစ်ပါ၏။ ရှေးဦးစွာ သူတို့ ယုံကြည်သော ဘာသာရေးခံယူချက်၊ ထုံးတမ်းစဉ်လာနှင့်အညီ ပြုမူဆောင်ရွက်တော့၏။ သူတို့ ဒေသ၊ သူတို့အရပ်၏ ရိုးရာအစဉ်အလာ ဘာသာရေးအရ လိုအပ်သမျှ ဆောင်ရွက်သည်။

မွေးကင်းစကလေးငယ်လေးသည် လူတစ်ဦးအဖြစ် မွေးဖွားလာပါလျက် သူ့တွင် မည်သည့် ရွေးချယ်ပိုင်ခွင့် တစ်စုံတစ်ရာမှမရှိဘဲ အလိုအလျောက် အရပ်ဒေသ၏ ဘာသာ ဝင်တစ်ဦးအဖြစ် သတ်မှတ်ခံရတော့သည်။ ယနေ့ လူ့လောက၌ရှိရှိသမျှ သော လူအားလုံးသည် ထိုသို့ဖြင့် မိမိတို့ မိဘမျိုးရိုး အစဉ်အလာအတိုင်း ထိန်းသိမ်းစောင့်ရှောက်မှု၊ သတ်မှတ် မှုမှန်သမျှ လိုက်နာနေထိုင်ကြရတော့သည်။ ထိုဘာသာဝင်ဖြစ်သွားသည့် အဆိုပါ ဘာသာတရား၏ အတိမ်အနက်၊ လောကကို သုံးသပ်ပုံ၊ လက် ခံပုံဆိုခြင်းများ တစ်လုံးတစ်ပါဒမှ မသိပါဘဲလျက် ထိုဘာသာဝင်ဖြစ် သွားသည်ဟု ဆိုခြင်းမှာ ငြင်း၍ရမည်မထင်ပါ။

လူသားလေးတစ်ဦးသည် တစ်သက်တာ အချိန်ကာလတစ်ခု၌ သူ လက်ခံထားရသော ဘာသာဝင်တစ်ဦးအဖြစ်ကို တွေးတောမိပြီး သူ့အတွေးအမြင်နှင့် ထိုဘာသာရေးကို လေ့လာမှု၊ ဆန်းစစ်မှုပြုလုပ်ရန်အားထုတ်သည်၊ ကြိုးပမ်းသည်ဆိုလိုက်သည်နှင့် ထိုလူငယ်လေးသည် သူ့ဘာသာကို စော်ကားသည်၊ ဆန့်ကျင်သည်ဟု သတ်မှတ်ခံရ တော့သည်။ ထိုသူများထဲတွင် အဆိုပါကလေး၏ မိဘနှစ်ဦး အပါအဝင် ဆွေးမျိုးတစ်သိုက် အားလုံးပါဝင်တော့၏။

ရိုးရာ အစဉ်အလာဆိုသည်မှာ လူမျိုးတစ်ခုတည်း၊ ဒေသတစ်ခုတည်း ၌သာရှိသည် မဟုတ်။ လူမျိုးအားလုံး၊ အရပ်ဒေသအားလုံးရှိ လောကသဘာဝနှင့် အညီဖြစ်ပေါ်လာသော အမူအကျင့်များသာဖြစ်သည်။ သူတို့ ရိုးရာဓလေ့နှင့်သူ ရှိသည်ချည်းဖြစ်၏။ ဤကလေး ဤအရပ်၌ မွေးဖွား၍ ဤဘာသာဝင်၊ ထိုကလေးက ထိုအရပ်၌ မွေးဖွား၍ ထိုဘာသာဝင် ဖြစ်ရသည်ဟု ပုံသေသတ်မှတ်ထားခြင်းဖြင့် လူ့လောကသည် ပုံစံတစ်ခုဖြစ်နေသည်။ တစ်ချိန်၌ ထိုကလေးများသည် ထိုသို့ တွေးတောမိသွား၏။

လူသားတစ်ဦးသည် ဤနေရာ၌ ကြီးပြင်းခဲ့၍ ဤဒေသဝန်းကျင်၊ ဤသဘာဝကို သိသည်။ ဤထုံးတမ်း အစဉ်အလာကို နားလည်သည်။ ဤသို့ သော ဘာသာစကားကို ပြောတတ်သည်။ ဤသို့သော အမူအကျင့်များ ပြုလုပ်တတ်သည်။ သူသည် ထိုသို့ ကြီးပြင်းခဲ့သည်။ ထိုအရာများသည် ထူးဆန်းသည့် ကိစ္စမဟုတ်။ လူတိုင်း ထိုသို့ပင်ဖြစ်လာနေသည့် ကိစ္စဖြစ်၏။ ဤသည်ကို ဘာသာရေး အချို့က သူတို့ အဖြေရှာမရသည့်အခါ သူတို့ယုံကြည်သော ဘုရားများ၏ အလိုကျဟုဆိုကြ၏။ ဘုရား၏ ခိုင်းစေမှုနှင့် ဤသို့ဖြစ်ရသည်ဟု အဓိပ္ပာယ်ဆောင်ကြ၏။

ဤနေရာ၌ လူသား၏ စိတ်ဓာတ်သည် အဓိကဖြစ်၏။ လူသားတစ်ဦးသည် သူယုံကြည်ရာကိုသာ ကြည့်တတ်၏။ ယုံကြည်ရာ ဆိုသည်မှာ သဒ္ဓါတရားဟု ဆိုရမည်။ လူသားအားလုံး၌ အမြဲရှိနေတတ်သည့်အရာမှာ စိတ်ခံစားချက်ဖြစ်၏။ ထိုစိတ်ခံ စားချက်မှ သဒ္ဓါတရားဆိုသည့် အရာက ပေါ်လာတတ်၏။ ထိုသဒ္ဓါဖြင့် သူ့ဘဝတစ်ခုလုံးပြုမူနေထိုင် ကျင့်သုံးတော့၏။

လူသားတစ်ဦး၏ ယုံကြည်မှု သဒ္ဓါတရားသည် အလွန်အရေးကြီး၏။ အဘယ်ကြောင့်ဆိုသော် လူသားသည် သူနေထိုင်သည့် ကာလတစ်လျှောက် သူကြုံတွေ့ခဲ့သည့် အတွေ့အကြုံများဖြင့် ထိုယုံကြည်မှုသဒ္ဓါက ပေါက်ပွားလာ၍့ဖြစ်သည်။ တိကျစွာဆိုရလျှင် သူပိုင် သဒ္ဓါတရားဖြစ်သည်။ မည်သူ၏ လမ်းညွှန်မှုမျှ မဟုတ်။ သူကိုယ်တိုင် တွေ့ရှိလာသော ခံစားမှုမှ ပေါက်ဖွားလာသည့် ယုံကြည်မှု သဒ္ဓါတရားဖြစ်၍ သူ လက်ခံထားခြင်းဖြစ်သည်။

လူသား၌ ယုံကြည်မှု သဒ္ဓါတရားပေါ်လာပြီဆိုသည်နှင့် ထို သဒ္ဓါတရားက အရာရာကို ဦးဆောင် သွားတော့၏။ လူအချင်းချင်းလည်း ထိုသဒ္ဓါတရားက ဦးဆောင်၍ ဆက် ဆံသည်။ ထိုသူ့အတွက် ထိုသဒ္ဓါတရားက သူ့ဘဝကို ဦးဆောင်သွားတော့၏။ သူ့လှုပ်ရှားမှုအားလုံးသည် ထိုသဒ္ဓါတရားက ရှေ့ဆောင်နေခြင်းဖြစ်၏။

လောကကြီးတစ်ခုလုံးသည် ဘုရားနှင့်ပတ်သက်သည်။ ဘုရားနှင့်မကင်း။ ခဲမှုန်လေးတစ်မှုန်မှစ၍ ဘုရားရုပ်တုတော်ကြီး၊ တောတောင် ရေမြေတစ်ခုလုံး ဘုရားဟု သတ်မှတ် လက်ခံထားသူများရှိပါ၏။ ထိုသူများကို မှန်သည် မှားသည်ဟု တစ်ဖက် နေရာမှ လက်ခံခြင်း၊ လက်မခံခြင်းထက် ထိုသူများ လက်ခံထားမှုနှင့် ထို သူများပြုကျင့်မှု ဆက်စပ်မှုရှိသည်ကသာ ကြည့်ကြရန်ရှိပါ၏။ ယနေ့ ဘာသာရေးများ ငြင်းခုံနေကြသည်မှာ မူလအခြေခံ လောကသည် ဘုရား၊ ဘုရား အလိုကျဆိုသော အမြင်များ အပေါ်မဟုတ်ကြပါ။ မိမိတို့ လက်ခံထားမှုများနှင့် မိမိတို့ ပြုကျင့်ဆောင် ရွက်မှုများ ကိုက်ညီမှု၊ မကိုက်ညီမှု၊ လွဲချော်မှုများကို ငြင်းခုံနေကြခြင်းသာဖြစ်သည်။

လောကသည် သူ့အရှိအတိုင်း၊ သူ့သဘာဝအတိုင်းဖြစ်နေသည်။ လူအများက မိမိတို့ပိုင် သတ်မှတ်၊ မိမိတို့ သဘာဝဟု ထင်မြင်၊ မိမိတို့မှ မှန်ကန်သည်ဟု တစ်ဖက်သတ်ယူဆ နေကြ၍ အချင်းများနေခြင်းသာဖြစ်သည်။

လောကသဘာဝသည် သူ့သဘောနှင့်သူ ပိုလျှင်ဖယ်ထုတ်၊ လိုလျှင်ထပ်ဖြည့် ချိန်ခွင်လျှာညီစေရန် ဆောင်ရွက်နေခြင်းသာဖြစ်သည်။ သို့သော် လူများက မိမိတို့ဆန္ဒနှင့်အညီ လောကကိုဖြစ်စေချင်နေခြင်းက လူ့လောက၏ ပြဿနာဖြစ်၏။

လူသားဆိုသည်မှာ ဤလောက ကြီးတစ်ခုလုံးထဲ၌ သဲမှုန်လေးတစ်မှုန် သာဖြစ်ပါလျက် ထိုသဲမှုန်လေးက ဤလောကကို သူပိုင်ဆိုင်သည်ဟု ထင် မှတ်ပြုမူနေခြင်းကြောင့် လူ့လောက၌ ပြဿနာများ တိုးပွားနေရခြင်းဖြစ် သည်။ မိမိတို့ကိုယ်မိမိတို့ သဲမှုန်လေး တစ်မှုန်ဟု လက်ခံလိုက်သည်နှင့် လောကနှင့် တစ်သားတည်းဖြစ်သွားကာ မည်သည့်ပြဿနာမှ ပေါ်ထွက်လာစရာအကြောင်းမရှိတော့ပေ။ ဘာသာရေး ခံယူချက်များသည် ထိုသို့သော ပြဿနာများကို အဖြေထုတ်ပေးနိုင်မည်ဖြစ်ပါ၏။

ဘာသာရေးဆိုသည်မှာ လူ၏မူရင်းနေရာကို လမ်းညွှန်ပေးသော အမြင်ဖြစ်၏။ လူတို့သည် မိမိတို့၏ မူရင်းအခြေအနေကို လက်သင့်မခံလိုကြ၊ သိပင်မသိလိုကြ၍ လူ့ပြဿနာများ ထပ်ဆင့်ထပ်ဆင့် တိုးနေခြင်းသာဖြစ်၏။

မောင်ဈေးကွက်
 
Untitled Document
No comments yet...be the first to comment
  Name :  (required)
  Email :  (will not be published) (required)
  Comment :
 
Email: [email protected] Copyright 2004 Zaygwet Journal. All rights reserved.
Powered By eTrade Myanmar Co., Ltd.