19-10-2017
HOME
ABOUT US
CONTACT US
  Untitled Document
Categories
Untitled Document
Untitled Document
ဒေသတွင်း သတင်းစုံ
စက်တင်ဘာလမှ ဒီဇင်ဘာလအထိ ၄ လတာ ကာလအတွင်း နိုင်ငံတကာ ခရီးသွားဧည့်သည် တစ်သန်းကျော် လာရောက်လည်ပတ်ရန် ခန့်မှန်းထား
This Week’s COVER
ဂျာနယ် အမှတ်စဉ် .... 1033
အိမ်ခြံမြေ ကြော်ငြာများ
Market Data
အာရှငွေကြေး အခြေအနေ
 USD   EUR 
USD 1 1.209
EUR 0.826

1 

JPY 105.93  128.091
SGD 1.691 2.044
THB 39.56 47.836
Advertising
 
စာပေနှင့် အနုပညာ
ပြာသောကြယ်ကို ဂုဏ်ပြုခြင်း - ၅

ဂျပန်ခေတ်တွင် 'အာရှလူငယ် အဖွဲ့'ပေါ်ထွန်းလာ၏။ ဝင်းတင်သည် အာရှလူငယ်အဖွဲ့ဝင်ဖြစ်သည်။

        အာရှလူငယ်အဖွဲ့သည် ဂျပန် ပြည်က စီးဆင်းလာသော အကြံဥာဏ်များ၊ စိတ်ကူးများ၊ မျှော်လင့် ချက်များ၊ ဂျပန်တို့၏ အလေ့အထ များဖြင့် ဖွဲ့စည်းထား၏။ ဆရာများမှာ ဂျပန်များ ပါဝင်၏။

        သို့သော် ဗိုလ်ချုပ်အောင်ဆန်းကဲ့သို့သော ပုဂ္ဂိုလ်များလည်းပါဝင်ဦး ဆောင်၏။ ဗမာ့တပ်မတော်ထဲမှ ပုဂ္ဂိုလ်များပါဝင်ဦးဆောင်သကဲ့သို့ နိုင်ငံရေးသမားများလည်း ပါဝင်ဦး ဆောင်၏။

        လူငယ်ဆိုသည်မှာ တိုင်းပြည်၏ အနာဂတ်ကို ဦးဆောင်မည့်သူများ ဖြစ်သည်။

        မည်သည့်တိုင်းပြည်တွင်မဆို တိုင်းပြည်၏ အနာဂတ်ကို ဦးဆောင် မည့် သူများမှာ လူငယ်များဖြစ်၏။

        အာရှလူငယ်အဖွဲ့သည် လူငယ် များကို မွေးမြူခြင်းဖြစ်သည်။ လူငယ်များကို ခေါင်းဆောင်ကောင်းများဖြစ်အောင်၊ စိတ်ဓာတ်ကောင်းများ ပိုင်ဆိုင်အောင်၊ အရည်အသွေးကောင်းများရှိအောင် အာရှလူငယ်က လေ့ကျင့်ပေးသည်၊ ပြုစုပျိုးထောင်ပေး သည်။

        ဂျပန်ခေတ်ကာလ အခါမျိုးမှာ အာရှလူငယ်အဖွဲ့သည် လူငယ်တို့အတွက် အရုဏ်ဦးဖြစ်သည်။ တက်ကြွလန်းဆန်းရာနေရာဖြစ်သည်။ မျှော်လင့်ချက်တို့ ရှင်သန်နိုးကြားရာ နေရာ ဖြစ်သည်။

        အာရှလူငယ်သည် လူငယ်စိတ် ဓာတ်။

        လူငယ်စိတ်ဓာတ်သည် အာရှ လူငယ်။

        ဂျပန်ခေတ်မှာ လူငယ်များသည် အာရှလူငယ် အစည်းအရုံးသို့ ဝင်ကြသည်။ ဂျပန်စာ၊ ဂျပန်စကားကို လည်း သင်ကြားကြရ၏။

        အာရှလူငယ် အစည်းအရုံးသည် ပိတ်သည်ဟူ၍မရှိ။

        အချိန်စာရင်း သတ်မှတ်၍ စာသင်ပေး၏။

        မြန်မာစာ

        အင်္ဂလိပ်စာ

        သင်္ချာ (၁)

        သင်္ချာ (၂)

        ပထဝီ

        သမိုင်း

        အထွေထွေသိပံ္ပ ဘာသာရပ်များကို အာရှလူငယ်အဖွဲ့အစည်းက သင် ကြားပေး၏။

        ဆရာများသည် မေတ္တာ၊ စေ တနာဖြင့် သင်ကြားပေးသောသူများ ဖြစ်ကြသည်။

        အလယ်တန်းအဆင့်၊ အထက် တန်းအဆင့် ခွဲခြား၍ သင်ကြားပေး၏။

        နံနက်ပိုင်းတွင် ကျောင်းဘာသာ ရပ်ဆိုင်ရာစာများ သင်ကြားသည်။ နေ့လယ်တွင် ဂျပန်စာ ဂျပန်စကား သင်ကြားပေး၏။

        ညနေပိုင်းတွင် အားကစား လေ့ကျင့်ခန်းများကို တက်ကြွစွာ ပျော်ရွှင်စွာ လုပ်ကြရသည်။

        အလေးမသည်။

        လက်ဝှေ့ထိုးသည်။

        မြန်မာလက်ဝှေ့ မဟုတ်ပါ။

        English Boxing  ဖြစ်၏။

        ကွင်းဘားဆွဲသည်။

        တန်းဘားလွှဲသည်။

        အာရှလူငယ်အသင်းတွင် အားကစားဆိုင်ရာ တာဝန်ခံဆရာများ ရှိ၏။

         အာရှလူငယ်အဖွဲ့သားများသည် မြို့ထဲရွာထဲ၊ အရပ်ထဲတွင် ပရဟိတ လုပ်ငန်းများကိုလည်း အခွင့်သင့်သလို လုပ်ဆောင်ကြ၏။ လမ်းခင်း၊ မြောင်းရှင်း၊ ရေကန်သန့် ရှင်း၊ ကြာကန်ဖော်စသော ပြည်သူလူထုကို အကျိုးရှိစေမည့် လုပ်ငန်းများ ကို လုပ်ဆောင်တတ်ကြ၏။

        အာရှလူငယ်အဖွဲ့တွင် လူငယ်များသည် အမျိုးသား၊ အမျိုးသမီး ရောထွေးလျက်ရှိ၏။ တစ်ဦးနှင့် တစ်ဦးမှာ မောင်နှမစိတ်ဓာတ်များ ဖြင့် ချစ်ခင်ရင်းနှီးစွာ ဆက်ဆံကြ သည်။ ယောက်ျားလေးဖြစ်စေ၊ မိန်းကလေးဖြစ်စေ 'ငါတို့ဟာ လူငယ်' ဆိုသော စိတ်ဓာတ်နှင့် လူငယ်ခေါင်းစဉ်အောက်မှာ လွတ်လပ်ပျော်ရွှင် ကြ၏။

        အာရှလူငယ်အဖွဲ့သည် နာမည်ဂုဏ်သတင်းကြီးလာ၏။ ခိုင်မာအား ကောင်းလာ၏။ ထိုအခါ အာရှလူငယ်အသင်းသည် စစ်ရေးသင်တန်း ပါ ပေးလာသည်။

        ဂျပန်များဘက်ကလည်း ဤလူငယ်များသည်တစ်ချိန်တွင် သူတို့ လူများဖြစ်လာလိမ့်မည်ဟု မျှော်လင့်၏။

        မြန်မာဆရာများကလည်း ဤ မြန်မာလူငယ်များသည် တစ်ချိန်တွင် ဂျပန်များကို မြန်မာနိုင်ငံမှ မောင်းနှင် တိုက်ထုတ်မည့် လူငယ်များဟု ယုံ ကြည်သည်။

        ဂျပန်ကို တိုက်ထုတ်ရန်အတွက် မြန်မာလူငယ်များသည် စစ်ရေးအရာမှာ တတ်မြောက်ကျွမ်းကျင်ရန် လို အပ်၏။

        လူငယ်များသည် ၁၄ နှစ်အ ရွယ် ၁၅ နှစ်အရွယ်များဖြစ်ကြ၏။

        လက်နက်တော့ မရှိ။

        တံမြက်စည်းကိုင်၍ ဝါးလုံးကိုင်၍ စစ်ရေးလေ့ကျင့်ခန်းလုပ်ကြရ၏။ တန်းစီ၊ ချီတက်၊ ဘယ်လှည့် ညာလှည့်၊ သက်သာ၊ သတိ၊ မှောက်လူး၊ ပစ်စသဖြင့် စစ်ရေးအခြေခံများကို လေ့ကျင့်သင်ကြားရ၏။

        အမှန်စင်စစ် အုပ်ချုပ်သူဂျပန်လူမျိုး မသိနိုင်အောင် မြန်မာဆရာများက လူငယ်များကို စစ်ရေးသင် တန်းပေးခြင်းဖြစ်ပါသည်။

        ကျန်းမာရေးလေ့ကျင့်ခန်း ဟန်ဆောင်ဘန်းပြ၏။ စစ်ရေးသင်တန်း ပေးခြင်းဖြစ်ပါသည်။

        အာရှလူငယ်အသင်းမှ လူငယ်ကျောင်းသားများသည် မည်သည့် အတွက်ကြောင့် စစ်ရေးသင်တန်း ထည့်သွင်းထားပါသနည်းဟု ပထမ ထူးဆန်းနေကြ၏။ နောင်မှ ဤစစ် သင်တန်းသည် ဂျပန်ကို တစ်ချိန်မှာတော်လှန်တိုက်ခိုက်နိုင်အောင် သင် ကြားပေးခြင်းဖြစ်သည်ဟု သဘော ပေါက်လာကြ၏။

        သမိုင်းဘာသာရပ်တွင် အနော်ရထာ၊ ဘုရင့်နောင်၊ အလောင်း ဘုရား၊ ကျန်စစ်သားစသော ရဲစွမ်းသတ္တိရှိသော ဥာဏ်ရည်ကြီးမြင့်သော ရှေးဘုရင်များအကြောင်းကိုဆရာများက အသေးစိတ်သင်ကြားသည်။ သူရဲကောင်းတို့၏ လူပ်ရှားမှု၊ သူရဲကောင်းတို့၏ ဂုဏ်ရည် သူရဲကောင်းတို့၏ပုံရိပ်ကို လူငယ်တို့မျက်စိထဲတွင် ထင်းထင်းကြီးပေါ်လာအောင် ဆရာများက သင်ကြားပေးကြ၏။

        စစ်ရေး သင်တန်းအပြင် နိုင်ငံ ရေးသင်တန်းလည်း ပေးသေး၏။

        နိုင်ငံရေးသင်တန်းတွင် အခြေခံနိုင်ငံရေးသဘောတရားများ၊ နိုင်ငံရေးသမိုင်းများ သင်ကြားရ၏။

        နိုင်ငံရေးသင်တန်းတွင် နိုင်ငံရေးခေါင်းဆောင်များ အတ္ထုပ္ပတ္တိကို သင်ကြားရသည်။ အလွန် စိတ်ဝင် စားဖွယ်ကောင်း၏။

        တရုတ်နိုင်ငံ၏ အမျိုးသားခေါင်းဆောင်ကြီး ဒေါက်တာဆွန်ယက်ဆင်၏ အတ္ထုပ္ပတ္တိကို သင်ကြား ရသည်။

        အိန္ဒိယနိုင်ငံရေး ခေါင်းဆောင်ကြီး မဟတ္တဂန္ဒီ၏ အတ္ထုပ္ပတ္တိကို သင်ကြားရသည်။

        ဖိလစ်ပိုင်နိုင်ငံမှ မျိုးချစ်သူရဲကောင်းကြီး ဂျိုဆေရီဇာအတ္ထုပ္ပတ္တိကို သင်ကြားရသည်။

        ဆရာများက ထိုစာအုပ်များကို ကောင်းကောင်းဖတ်ထားကြ၏။

        လူပုဂ္ဂိုလ်တို့၏ အတ္ထုပ္ပတ္တိမှာ စိတ်ဝင်စားဖို့ ကောင်းသည်။

        စိတ်ဓာတ်များ၊ အတွေးအခေါ်များ၊ အပြုအမူများကိုအတုခိုးရသည်။ အားကျရ၏။

        စည်းရုံးရေး ခွန်အား၊ မေတ္တာ ခွန်အား၊ ဇွဲသတ္တိခွန်အားများကို ရရှိကြရ၏။

        ထိုဆရာများ၏ သင်ကြားမှုကို ခံယူရသဖြင့် ဝင်းတင်သည် လူပုဂ္ဂိုလ် အကြောင်း စာအုပ်များကို ကိုယ့်နည်းကိုယ့်ဟန်ဖြင့် ရှာဖွေဖတ်ရှုလာမိ၏။ အရေးတော်ပုံ စာအုပ်များကိုလည်းဖတ်မိလာ၏။ စာအုပ်များထဲတွင် စိတ်ဝင်စားဖွယ်ရာ စွန့်စားခန်းများ ပြည့်နှက်နေသည်။

        အာရှလူငယ်အဖွဲ့သားများသည် လူငယ်များဖြစ်သည့်အတွက် နိုင်ငံရေး သဘောတရားများကို ထက်သန်မှုအားနည်းကြောင်း ဆရာများကရိပ်စားမိပြီး ဖြစ်ပါသည်။

        လူပုဂ္ဂိုလ် အတ္ထုပ္ပတ္တိများကိုမူ လူငယ်များက အထူးစိတ်ဝင်စားကြ ၏။ နိုင်ငံရေး စိတ်ဓာတ်။ နိုင်ငံရေး လှုပ်ရှားမှုနှင့် တိုင်းပြည်လွတ်လပ်ရေး အတွက် ကိုယ်ကျိုးစွန့် ဆောင်ရွက် ကြပုံများကို ရရှိကြရ၏။

        ဂျပန်စာ၊ ဂျပန်စကား သင်တန်း တက်ချိန်မှာ ဂျပန်တို့သည် စည်း ကမ်းကြီးကြ၏။ ကြမ်းတမ်းကြ၏။ ရိုင်းစိုင်းကြ၏။ ရက်စက်ကြ၏။ မြန်မာလူငယ်များ၏အပြုအမူ၊ အနေအထိုင်၊ ဝတ်စားဆင်ယင်မှုတို့ ကို ဂျပန်ဆရာက မကြိုက်လျှင် ရှေ့သို့ ခေါ်ပြီး မတ်တတ်ရပ်ခိုင်း၏။ ပါး ကို ဖြောင်းခနဲ ဖြောင်းခနဲ မြည် အောင် ရိုက်ပစ်၏။      

        ဝင်းတင်သည် အာရှလူငယ် အသင်းဝင်အဖြစ် ပျော်ပျော်ကြီးသင်ယူ၏။ လှုပ်ရှားမှုများ ပြုလုပ်ရသည် ကို အထူးခုံမင်သည်။

        ဆိုပါစို့၊ အိမ်တွေပေါ်မှာ ဗုံးကျ ပြီဆိုလျှင် အိမ်တွင်းမှာရှိသော လူကြီးသူမကို မည်သို့ ကယ်တင်မည်နည်း။

        ''လက်တွေ့ သင်တန်းပေးသည်။ ဈေးနှင့် မျက်နှာချင်းဆိုင် ဦးသာလင်း၏ နှစ်ထပ်တိုက်တွင် လက်တွေ့လေ့ကျင့်ကြ၏။ ဦးသာလင်း၏တိုက်သည် လသာဆောင်လည်း ပါဝင်သည်။

        လူနာလုပ်မည့်သူ လိုနေသည်။

        ''လူနာ ကျွန်တော် လုပ်မယ်''

        ဝင်းတင်က အော်ပြော၏။

        ''ကဲ မင်းလုပ်ချင်ရင်လည်း လုပ်ကွာ''

        ဝင်းတင်ကို ခပ်ကြီးကြီး လူငယ်များက ထမ်းပိုးကြ၏။ တိုက်အပေါ် ထပ်ကနေ ကယ်ဆယ်လာသည့် သဘော။

        အောက်ထပ်သို့ တိုက်အပြင်က ဆင်းရ၏။ လှေကား ထောင်ထားသည်။

        လှေကားဆီသို့ ရောက်ရန်သွပ်ပြားများကို နင်းသွားရ၏။ သွပ်ပြားများ မိုးထားပုံက သိပ်မကောင်း။

       ဝင်းတင်သည် သွပ်ပြားပေါ်မှာ ဖြတ်နင်းနေ၏။ သွပ်ပြားက ကျွံကျသွားသည်။ ဝင်းတင်သည် အောက်သို့ပြုတ်ကျသွားတော့၏။ ခါးဆစ်ရိုးများကျိုးလုနီးပါး ဒဏ်ရာရသွားသည်။

        ဂျပန်ခေတ်။

        ဝင်းတင်သည် ခါးကဒဏ်ရာကြောင့် အိမ်ထဲမှာသုံးလကြာအောင် အောင်းနေလိုက်ရတော့၏။

မောင်ကိုကို (အမရပူရ)

မောင်ကိုကို (အမရပူရ)
 
Untitled Document
No comments yet...be the first to comment
  Name :  (required)
  Email :  (will not be published) (required)
  Comment :
 
Email: [email protected] Copyright 2004 Zaygwet Journal. All rights reserved.
Powered By eTrade Myanmar Co., Ltd.