24-8-2017
HOME
ABOUT US
CONTACT US
  Untitled Document
Categories
Untitled Document
Untitled Document
ဒေသတွင်း သတင်းစုံ
၂ဝ၁၇ ခုနှစ် ဧပြီလ ၁ ရက်နေ့မှ သြဂုတ်လ ၃ ရက်နေ့အထိ လေးလတာကာလအတွင်း တာချီလိတ်နယ်စပ်ဝင်ပေါက်မှ နိုင်ငံတကာ ခရီးသွားဧည့်သည်ရှစ်ထောင့်ငါးရာကျော်ဝင်ရောက်လည်ပတ်ခဲ့
This Week’s COVER
ဂျာနယ် အမှတ်စဉ် .... 1025
အိမ်ခြံမြေ ကြော်ငြာများ
Market Data
အာရှငွေကြေး အခြေအနေ
 USD   EUR 
USD 1 1.209
EUR 0.826

1 

JPY 105.93  128.091
SGD 1.691 2.044
THB 39.56 47.836
Advertising
 
သူတို့ ဘ၀မှတ်တမ်း
ပြာသောကြယ်ကို ဂုဏ်ပြုခြင်း - ၆

 

 

ဝင်းတင်သည် ငယ်စဉ်ကပင် ဗိုလ်ချုပ်အောင်ဆန်းကို ကြည်ညို သည်။

ဝင်းတင်သည် ဗိုလ်ချုပ်အောင်ဆန်း၏အသံကို ကြို့ပင်ကောက်နှင့် တစ်မိုင်သာသာမျှပင် ဝေးကွာသော ရှမ်းစုရွာကလေးမှအမြဲနားစွင့်၏။

ဗိုလ်ချုပ်အောင်ဆန်း၏စကား

ဗိုလ်ချုပ်အောင်ဆန်း၏စိတ်ထား

ဗိုလ်ချုပ်အောင်ဆန်း၏ ရည်ရွယ်ချက်

ဗိုလ်ချုပ်အောင်ဆန်း၏ အပြုအမူ

ဗိုလ်ချုပ်အောင်ဆန်း၏ အမြော်အမြင်

ဝင်းတင်က ကြည်ညိုသည်။

''ကျွန်တော်တို့ မြန်မာတွေ ဘာကြောင့် အင်္ဂလိပ်များခြေဖဝါးအောက် ကျွန်သားပေါက်အဖြစ် ကျရောက်ခဲ့ကြသလဲဆိုတာ အဖြေရှာလျှင်မြန်မာဆိုတဲ့ တစ်နိုင်ငံတည်းတည်းနေထိုင်လာခဲ့ကြတဲ့ အကြောင်းကြောင့်လို့ အဖြေထွက်လာ တာတွေ့ကြရပါလိမ့်မယ်''

 ဗိုလ်ချုပ်အောင်ဆန်း ပြောကြားသော စကား။ ဝင်းတင်က လက်ခံသည်။ ဝင်းတင်က မှတ်သားသည်။ အလွတ်ရသည့် စကားလုံးကို ရနေသည်။

        ''မြန်မာနိုင်ငံတော်ကို ကာကွယ်ဖို့ဆိုရင် ဘာတွေလိုလာသလဲ။

        စစ်တပ်တွေ အများကြီးလိုတယ်ဆိုတာ အသေအချာပဲ''

        ဗိုလ်ချုပ်အောင်ဆန်းက ပြောကြားသော စကား။

        ဝင်းတင် မှတ်သားထားသည်။

        အင်္ဂလိပ်လက်အောက်

        ဂျပန်လက်အောက်

        ထုိ့နောက် အင်္ဂလိပ်လက်အောက်ကျရောက်ခဲ့ရသော မြန်မာနိုင်ငံဖြစ်သည်။ ဂျပန်ကို မောင်းထုတ်ရန်လိုသည်။ အင်္ဂလိပ်ကို တွန်းလှန်ရန်လိုသည်။

 ''ဒီစစ်တပ်တွေအတွက်ဆိုရင်လည်း ကုန်းတပ်၊ ရေတပ်၊ လေတပ် လိုတာပါနေပါတယ်။ ကျွန်တော်တို့ကာကွယ်ရေးအတွက် စစ်တပ်တွေ  လိုလာတယ်ဆိုရင် လူဦးရေအများကြီးလိုလာလိမ့်မယ်။

  ဒီနောက်တော့ ဒီလူတွေကို ကျွေးမွေးထောက်ပံ့ဖို့ အစားအစာ၊ အသုံးအဆောင်တွေ အများကြီးပဲ လို လာပါလိမ့်မယ်။

ဒီစစ်တပ်တွေကို လက်နက်ခဲယမ်းမီးကျောက်တွေအလုံအ လောက်တပ်ဆင်ပေး နိုင်ဖို့ ငွေအစရှိတဲ့ စစ်အသုံးအဆောင်တွေလည်း အများအပြားပဲ လိုလာကြပါလိမ့်မယ်။

        ဒါကြောင့် ဒီလိုအသုံးအဆောင်တွေပြည့်ပြည့်စုံစုံ ကျွန်တော်တို့မှာ ရှိပြီးကြပလား''

        ဗိုလ်ချုပ်အောင်ဆန်း၏ စကားဖြစ်ပါသည်။

        ၁၅ နှစ်သားအရွယ် ဝင်းတင်ကအလွန်သဘောကျပါ၏။

 ဝင်းတင်သည် ရှမ်းစုရွာကလေးမှာနေထိုင်ရင်း ဗိုလ်ချုပ်အောင်ဆန်း၏ စကားကို ရရာနေရာမှ ကူးယူ မှတ်သားသည်။ ထပ်ကာထပ်ကာ ဖတ်သည်။

 ဝင်းတင်၏ ၁၅ နှစ်သားမှာ တွေ့သမျှစာကိုဖတ်သည်။ လမ်းမှန်သမျှကိုလည်း လျှောက်သည်။

ဝင်းတင်တို့နေရာနှင့် ပဲခူးရိုးမတောင်သည်ကိုးမိုင်မျှသာ ဝေးကွာ၏။

ပဲခူးရိုးမနှင့် ဝင်းတင်နေထိုင်သော ရှမ်းစုရွာအကြားမှာ ရွာကလေးများရှိသည်။ ထိုရွာများတွင် ကရင်များ၊ ရှမ်းများ နေထိုင်ကြသည်။ အမှန်တော့ ဝင်းတင်နေထိုင်သော အိမ်ကပင် ရှမ်းအိမ်ဖြစ်သည်။ ဝင်းတင်သည် ဟိုရွာသည်ရွာ ဖြတ်သန်း သည်။ ရွာတွေထဲသို့ တိုးဝင်သည်။

 ရှမ်းတိုင်းရင်းသားများ၊ ကရင်တိုင်းရင်းသားများ၊ အားလုံးသည် ပြည်ထောင်စုတိုင်းရင်းသားများဖြစ် သည်။

        ဝင်းတင်သည် သူတို့၏ ဘဝ၊ သူတို့၏ ရိုးသားမှုများ သူတို၏ ဘဝ နေဟန်များကို စိတ်ဝင်စားသည်။ ချစ်ခင်လေးစား၏။

        ရှမ်းရွာမှာ နေထိုင်စဉ် နေ့တစ်နေ့။

        ထိုနေ့ကို ဝင်းတင်တစ်သက် တွင်မမေ့။

        မနက် မိုးလင်းလာသည်။

        ''ကလေးတွေ ငြိမ်ငြိမ်နေ၊ လုံးဝ မလှုပ်နဲ့။ လုံးဝအသံမထွက်နဲ့''

        ဝင်းတင်သည် ထမင်းစားသော အခါ အသံမထွက်အောင်စားရသည်။

        ဘာလို့လဲမသိ။ ထူးတော့ ထူးတယ်။

        ဝင်းတင်တွေးသည်။ အဖြေမသိ။ ညသန်းခေါင်ကျော်။

        ဝင်းတင်နေထိုင်သောအိမ်သို့ ဗိုလ်ချုပ်အောင်ဆန်းသည် ဆိုက်ဆိုက်မြိုက်မြိုက် ရောက်လာ၏။

        ဗိုလ်ချုပ်အောင်ဆန်းနှင့်အတူ ဗိုလ်မင်းခေါင်ပါဝင်သည်။

        ဗိုလ်ချုပ်အောင်ဆန်း၏ တော်လှန်ရေး ခရီးအစဖြစ်သည်။

        ဗိုလ်ချုပ်၏ တော်လှန်ရေးခရီးအစမှာ ကြို့ပင်ကောက်သို့ ရောက်လာသည်။

        ရှမ်းစုရွာက ဝင်းတင်နေထိုင်သောအိမ်သို့ ရောက်လာ၏။

 ဗိုလ်ချုပ်အောင်ဆန်း၊ ဗိုလ်မင်းခေါင်နှင့် ကားမောင်းသမားတို့သည် တစ်ညလုံး ရွာများကို ဖြတ်သန်း မောင်းနှင်လာခဲ့ကြ၏။       

        ရှမ်းစုရွာမှာ ခေတ္တနားခိုလိုက်ကြ ခြင်းဖြစ်သည်။

        မြို့များကို မဖြတ်သန်း။

        ရွာများကို ဖြတ်သန်းသည်။

        အင်္ဂလိပ်စစ်သေနတ်ကို ရှောင်ရှားရန်လို၏။ တပ်ဆုတ်နေသော ဂျပန်တို့ကို လည်း ရှောင်ရှားရန်လိုသည်။

        ခရီးပန်းလာသော ဗိုလ်ချုပ်အောင်ဆန်းတို့အဖွဲ့သည် တစ်ညလုံး အိပ်စက်ကြ၏။ မိုးလင်းသော်လည်းမထသေး။

        ''ဗိုလ်ချုပ်အောင်ဆန်းတို့ ရောက်နေတယ်။ မဆူရဘူး။ မဆော့ရဘူး။ ငြိမ်ငြိမ်လေးနေကြ''

        မွန်းလွဲ တစ်နာရီတွင် ဗိုလ်ချုပ်တို့သည် အိပ်ရာကနိုးထလာကြ၏။

        ရှမ်းစုရွာ၏ မရမ်းပင်ကြီးများအောက်တွင်ရေတွင်းရှိသည်။ မရမ်း ပင်ကြီးတစ်ပင်အောက်တွင် စဥ့်အို ကြီးများရှိ၏။

ဝင်းတင်တို့အိမ်တွင် အဒေါ်အပျိုကြီးများရှိသည်။ ဝင်းတင်နှင့် ဝင်းတင်၏ဦးလေး ရှိနေသည်။ အပျိုကြီးများက ဘာသိဘာသာနေကြ သည်။

ဗိုလ်ချုပ်အောင်ဆန်းတို့သည် ရေချိုးကြတော့မည်။

 ဦးလေးက ရေတွင်းမှရေကိုခပ်သည်။ ဝင်းတင်က ပုံးများနှင့်သယ်သည်။ စဥ့်အိုးကြီးများထဲသို့လောင်းထည့်၏။ ရေတွင်းနှင့် စဥ့်အိုးများသည် မဝေးကွာလှပါ။ ဆယ့်ငါးလှမ်းလှမ်းလျှင် ရေလောင်းထည့်၍ရပြီ။

ဗိုလ်ချုပ်အောင်ဆန်းသည် ရေချိုးနေပြီ။ ဝင်းတင်သည် ဗိုလ်ချုပ်အောင်ဆန်း ရေချိုးရန် ရေပုံးများဖြင့် တဗွမ်းဗွမ်းလောင်းထည့်ပေးနေ၏။

ဗိုလ်ချုပ်အောင်ဆန်း။ လူတိုင်းက ဤနာမည်ကိုကြားဖူးနေကြသည်။ တဖွဖွပြောဆိုနေကြသည်။ သို့သော် လူတိုင်းက ဗိုလ်ချုပ်အောင်ဆန်းကို မမြင်ဖူးကြပါ။

        ဝင်းတင်သည် ဗိုလ်ချုပ်အောင်ဆန်းချိုးဖို့ရေကိုပင် သယ်ဆောင် ပေးခွင့်ရနေသည်။

        မည်မျှ ကံကောင်းပါသနည်း။

        ဝင်းတင်သည် ရေပုံးကို စိတ်ပါလက်ပါဆွဲနေ၏။ ကျေကျေနပ်နပ်ကြီး လောင်းထည့်ပေးနေသည်။

        ဗိုလ်ချုပ်သည် စကားတစ်ခွန်းမျှမပြော။

 ဗိုလ်ချုပ်အောင်ဆန်း၏ အသားမှာလတ်သည်။ ထိပ်ကနည်းနည်းချွန်း၏။ ထိပ်နည်းနည်း ပြောင်သေး၏။ နဖူးသည်မြင့်၏။  အနည်းငယ်ပြောင်၏။

ဗိုလ်ချုပ်အောင်ဆန်း ရေချိုးနေသည်။ ဝင်းတင် ရေဆွဲထည့်ပေးနေ သည်။

ဗိုလ်ချုပ်သည် ဝင်းတင်ကုိုအား နာဟန်လည်းမပြ။ ငဲ့ညှာဟန်လည်းမပြ။ သနားဟန်လည်းမပြ။ ရေကိုသာ တဗွမ်းဗွမ်းခပ်ချိုးနေ၏။

ဝင်းတင်တို့အိမ်မှာ ဆပ်ပြာမရှိ။ မျက်နှာသုတ်ပဝါမရှိ။ မရှိသည့် အ ရာများကို မပေးနိုင်။ ဗိုလ်ချုပ်ကလည်း ''ဆပ်ပြာမရှိဘူးလား''ဟု မ မေး။ မျက်နှာသုတ်ပဝါကို မတောင်း။ ရေကိုတော့ ဝအောင်ချိုးနေ၏။

 ဝင်းတင်က ဗိုလ်ချုပ်အောင်ဆန်းကို စကားပြောချင်လာသည်။

ဗိုလ်ချုပ်အောင်ဆန်းတို့၏ စစ်တပ်ကိုလည်း ဝင်းတင်ကအားကျသည်။ အာရှလူငယ်သင်တန်းသားဖြစ်ထားသော ဝင်းတင်အတွက် စစ် ရေးလေ့ကျင့်ခန်းများနှင့်လည်း မဝေးကွာပါ။

        ''ဗိုလ်ချုပ် ကျွန်တော်စစ်ထဲဝင် ချင်တယ်''

       ဝင်းတင်သည် သူ့ထက်သန်မှုကို ဗိုလ်ချုပ်ထံ ဖွင့်ချလိုက်၏။

       ဗိုလ်ချုပ်က ဘာမှ ပြန်မပြောသေး။

       ဗိုလ်ချုပ်အောင်ဆန်းသည် ဝင်းတင်ကို တစ်ချက်ကြည့်လိုက်၏။

       ''မင်းကျောင်းနေလား''

       ''ဟုတ်ကဲ့ ကျွန်တော် စာသင်နေ ပါတယ်။ ခုနစ်တန်းအောင်ပြီးပြီ''

       ဗိုလ်ချုပ်သည် ရေလဲပုဆိုးဖြင့် သူ့ကိုယ်ပေါ်မှ ရေမှုန်ရေမွှားများကို သုတ်နေ၏။ တစ်ချက်ငေးလိုက် သည်။

       ''စာဆက်သင်။ စစ်တိုက်မယ့်လူတွေရှိတယ်။ စာတတ်တဲ့သူတွေ အများကြီးလိုတယ်။ မင်း စာဆက်သင်ဦး''

ဗိုလ်ချုပ်အောင်ဆန်းသည် ဝင်းတင်ကို ထိုစကားလေးကိုသာ ပြောလိုက်၏။ ဗိုလ်ချုပ်အောင်ဆန်းသည် ရေလဲပုဆိုးဖြင့် သူ့ကိုယ်ပေါ်မှ ရေများကို ဆက်သုတ်နေ၏။

        ''မင်း စာဆက်သင်''

        ဝင်းတင်၏ အသည်းထဲမှာမှတ်သားထားသည်။

 

မောင်ကိုကို (အမရပူရ)

မောင်ကိုကို (အမရပူရ)
 
Untitled Document
No comments yet...be the first to comment
  Name :  (required)
  Email :  (will not be published) (required)
  Comment :
 
Email: [email protected] Copyright 2004 Zaygwet Journal. All rights reserved.
Powered By eTrade Myanmar Co., Ltd.